امامك ينتظر يالتندب الحجة
يمتى تسر دليله وتعمل بنهجه
تعال افتح دليلك والقي هالنظرة
امامك ينتظر لو انت تنتظره ؟
افرض دز عليك المهدي وتحضره

قلي بيا عذر عندك التعتذره؟
وانت بسيرتك تدريها معوجة
تنخى المنتظر وتحلفه بالزهرة
وتعصي خالقك باليوم ألف مرة
اشلون المهدي تطلب منه فد نظرة
وانت تخالفه والقلبه تكسره ؟

والتكسر دليله اشمنه تترجى
تكسر خاطره بكل ليلة كل صباح
من تنسف قيم وتنادي بالاصلاح
من تظلم صديقك عن عمد يا صاح
ومن اتخلي دينك فدوة للأرباح
والربح الحرام محلل تخرجه

تكسر خاطره للمهدي بأفعالك
ولكن حاضر وينظر لافعالك
والله لو افعالك تشبه الأقوالك
جان المنتظر هو الي تعنالك
ويشع عليك مثل القمر من برجه

قلبك ما يطابق كلمة لسانك
وأسرارك تخالف صفحة اعلامه
بيِض صفحتك خليرتفع شانك
وخليرتاح من الذنب وجدانك
ليش الصافي ويا الخابط تمزجه

مهدينا يريد اخوانه واعوانه
مهديين ملتزمين عنوانه
مو مثل الدليله يخالف لسانه
ولا مثل الي عنده عيوب لاخوانه
ولا مثل اليحوك القدر وينسجه

مهدينا يريد قلوب مأتلفه
مو تحمل شعاره وهي مختلفه
المهدي مو شعار تردده الشفه
المهدي في الاسم من الهدى وصفه
مهدينا يا صاح من الظلم منجى

مهدينا بشارة خير للاصلاح
والمصلح يراقب كل عمل يا صاح
منو الينصح..منو اليسمع .. منو النصاح
منو الفاتح دليله منو الرايد يعم الخير والبهجة

لو تقبل نصيحة كل من ينصحك
ابد لا تظن سهام الشامتة تجرمك
ولو عفت النصيحة ومبسمك يضحك
أعمالك ترى بميعادك تفضحك
وتصبح للخلق يوم الحشر فرجة

فرجة تصير بين الخلق والمهدي
أولهم يصيح علي متعدي
مو انت الكنت مسلم لكن ضدي؟
مو انت السرت عكس النبي جدي؟
مو انت الكنت كل فاسد تروجه؟

وحاشى المثلي ومثلك يوقف ضده
أبوصالح حبيب الروح ونوده
وحق امه الزجية الطاهرة وجده
نظل على العهد نعمل على عهده
ونفدي له القلب والروح والمهجه

ومثل ما ننتظر والينا ونراقب
نراقبها النفسنا دوم ونحاسب
حتى ما يظل بيناتنا حاجب
وتزول السحاب ويظهر الغايب
مثل ضي القمر ظهر من برجه